22082019Jue
Última edición: Jue, 22 Ago 2019 10pm

Os sindicatos convocan asembleas en PSA Vigo para preparar a folga do xoves

CIG, CCOO e UGT urxen á dirección a buscar solucións inmediatas “se non queren atoparse con outra convocatoria para a semana que vén”

14 Mayo 2019 por
Valora este artículo
(0 votos)
Unha concentración ás portas de PSA Vigo. / Foto: CIG Unha concentración ás portas de PSA Vigo. / Foto: CIG

CIG, CCOO e UGT van realizar este mércores 15 de maio asembleas de traballadores nas tres quendas laborais das liñas de montaxe, naves e ferraxe para informar e preparar a xornada de folga convocada para xoves co obxectivo de esixir solucións á sobrecarga de traballo na montaxe (con especial incidencia na liña 2) e que se contrate ao persoal necesario para poder sacar adiante a actividade.

As tres organizacións sindicais lembran que levan preto de cinco meses solicitando medidas para que o persoal de montaxe teña mellores condicións nos postos de traballo, sen que ata o momento a dirección teña adoptado ningún tipo de solución. E así llo volveron lembrar na reunión extraordinaria mantida este luns co director do centro, que apelou ao "diálogo" e á "reflexión".

Neste senso, a representación de CIG, CCOO e UGT defende tamén a reflexión e o diálogo pero critica a esterilidade destes encontros “xa que a dirección segue sen querer abordar a creación de postos, a redución das cargas de traballo, a recuperación de operacións externalizadas, a falla dun mapa de postos esixentes fisicamente ou a ausencia dunhas rotacións que sirvan para evitar lesións”.

De feito, critican que fora necesario ter enriba da mesa unha convocatoria de folga “para que a dirección recoñecera publicamente que hai sobrecarga de traballo na liña 2”. Por iso, reiteran a súa disposición ao diálogo, mais insisten en que non van desconvocar o paro “porque non nos podemos fiar das boas palabras de quen leva catro meses demorando a posta en marcha de medidas urxentes para mellorar as condicións laborais”. “Queremos feitos e querémolos xa”, engaden.

A este respecto, urxiron á dirección a buscar solucións inmediatas “se non queren atoparse  con outra convocatoria de folga para a semana que vén”.

Inicia sesión para enviar comentarios

transporte

navidad 2019

mar

celta

patrimonio de la humanidad

  • Últimas noticias

  • Más leído