Silva informou que “dentro do Plan Estratéxico de Turismo formulábase como liña estratéxica a creación dunha Mesa Provincial do Turismo na que se darían cita todas as administracións públicas e organizacións privadas para ir acordando accións para poñer en valor un sector, como é o turismo, que supón o 11% do PIB galego”.
Ao respecto, deu a coñecer os principais puntos que recolle a proposta de regulamento do funcionamento interno da Mesa, cuxos integrantes teñen de prazo dez días para aportar suxestións de mellora.
Máis polo miúdo, segundo especifica a proposta de regulamento, ao longo do ano haberá dúas reunións que poderán ampliarse con convocatorias extraordinarias de precisarse. Nestes encontros estudaranse as necesidades do sector, a posta en marcha de produtos turísticos orientados a desestacionalizar a demanda ou, entre outras cuestións, as accións de promoción a poñer en marcha.
A Mesa Provincial do Turismo estará integrada por 20 persoas: a presidenta da Deputación de Pontevedra e tres representantes da institución provincial (o deputado delegado de Turismo, a xefa de servizo de Turismo e unha persoa de perfil técnico), unha persoa en representación de Turismo de Galicia e outra da Secretaría de Turismo do Estado, sete membros do sector público da provincia e un de cada concello que supere os 50.000 habitantes (Vigo e Pontevedra).
Tamén haberá dúas persoas en representación dos concellos de interese turístico da provincia e outra dos destinos adheridos ao SICTED. Das entidades supramunicipais haberá dúas persoas (unha dos grupos de acción local participativa do sector pesqueiro e outra de entidades con funcións de xestión e promoción turística como poden ser as mancomunidades).
Ademais, tamén se darán cita na Mesa tres representantes do ámbito académico (Máster de Turismo da Universidade de Vigo, CIPF Manuel Antonio e CIPF Carlos Orozoa), outra do Aeroporto de Vigo e tres do sector turístico privado (Clúster de Turismo, Feprohos e da Ruta do Viño).
