Rosa Piñeiro Guerrero é a nova xefa de servizo do centro de saúde do Casco Vello, no que leva traballando 13 anos. Licenciada en Medicina pola Universidade de Salamanca en 1987, obtivo a especialización en Medicina Familiar e Comunitaria no ano 1991. Con anterioridade ao Casco Vello traballou 15 anos no centro de saúde de Cangas.
José Ángel González Alonso pasa a ser xefe de servizo do centro de saúde de A Cañiza, no que xa traballa como facultativo desde hai 11 anos. Licenciado en Medicina pola Universidade de Santiago de Compostela en 1990, obtivo a especialidade no ano 1994. Con anterioridade ao seu destino actual, traballou en Atención Primaria de Ourense, principalmente no centro de saúde de A Ponte, aínda que estivo destinado en varios centros máis da área sanitaria ourensá.
Roberto Devesa González é o novo xefe de servizo do centro de saúde de Redondela, no que leva traballando desde hai 9 anos. Licenciado en Medicina pola Universidade de Santiago en 1993, obtivo a especialidade en 2000. Antes do seu destino en Redondela estivo 12 anos como xefe de sala no 061.
Cos nomeamentos que se fan públicos este martes, a xerencia inicia o proceso de renovación das xefaturas de servizo nos centros de saúde da área sanitaria. O proceso irase resolvendo paulatinamente con novos nomeamentos.
