O coordinador deste encontro, Francisco Román explica que“trátase dunha actividade formativa anual, convocada para profesionais de toda España, que ten como obxectivo actualizar os coñecementos que permiten identificar as complicacións do TPH, establecer e implantar medidas preventivas, e planificar coidados enfermeiros baseados na evidencia, para facer fronte ás complicacións que presentan este tipo de pacientes”-.
Na edición deste ano, abórdanse, entre outros, os seguintes temas: as novidades terapéuticas, os novos retos do control dos xermes multirresistentes nas unidades de TPH, a biovixilancia e trazabilidade, a preservación da fertilidade antes da quimioterapia, os roles avanzados de coordinación das enfermeiras nestas unidades ou o papel das terapias complementarias na recuperación do paciente despois dun transplante.
A xornada remata dando protagonismo aos pacientes, coa testemuña dunha paciente transplantada no Chuvi e representantes da Asociación de pacientes ASOTRAME que falaran da recuperación das súas vidas despois dun TPH.
Medio centear de transplantes no Cunqueiro
A unidade de Transplante de proxenitores hematopoiéticos (TPH) do Servizo de Hematoloxía do Chuvi está acreditada polo Grupo Español de Transplante Hematopoiético para todas as modalidades de TPH en idade adulta: autólogo, aloxénicos -de doador emparentado e non emparentado-, de proxenitores de sangue de cordón umbilical, e Infusión de linfocitos de doador.
Os transplantes autólogos son aqueles nos que poden utilizarse tanto a medula ósea como as células nai que circulan polo sangue do propio paciente. Unha vez extraídas e tratadas con medicación, vólvense a infundir ao paciente.
O transplante aloxénico emparentado é aquel no que non se poden usar as células propias do paciente e hai que buscar un doador, dentro da familia, que sexa compatible. O transplante aloxénico non emparentado é no que non poden utilizarse as células propias do paciente e tampouco hai un doador compatible dentro da familia.
Leucemia aguda, linfoma e mieloma múltiple son as principais enfermidades que poden beneficiarse dun trasplante de médula. Dende o ano 2000 ata 2015, realizáronse no CHUVI máis de 600 transplantes de médula ósea (636). No que vai de ano 2016, no HAC realizáronse 50 TPH: 28 autólogos, 18 aloxénicos de doador emparentado e 4 alóxenicos de doador non emparentado.
“Hai que subliñar– asegura Román- que o servizo de Hematoloxía do Álvaro Cunqueiro realiza todo o proceso de transplante, dende a extracción dos proxenitores, a súa conxelación e conservación, e a posterior infusión ao paciente”-.
Medios no Cunqueiro
A Unidade de TPH do Chuvi, emprazada no hospital Álvaro Cunqueiro, dispón na actualidade de 5 habitacións con presión positiva e con esclusa para illamento inverso (fronte ás tres do Hospital Xeral), o que supón un incremento de mais do 65% da súa capacidade. Así mesmo, dispón dunha zona específica para os acompañantes dos pacientes. “A estadía media dos pacientes hospitalizados para un transplante deste tipo é de 4-5 semanas en réxime de illamento, e moitas veces os seus acompañantes permanecen con eles períodos longos de tempo, polo que queremos ofertarlles as maiores comodidades posibles nesta área, que conta cunha área propia de acompañantes, con zona de estar con taquillas e baños específicos, así como cun menú diario completo. Tamén facilitáselles acceso de balde á rede wifi do hospital”-.
Potenciar a doazón de médula osea
Aínda que no ano 2015 Galicia aumentou nun 32% o número de doazóns de medula ósea (1.347) respecto ao ano anterior (1.250), é necesario seguir potenciando estas doazóns. Poden ser doadores de médula ósea as persoas de 18 a 55 anos que non padezan ningunha enfermidade transmisible ou que poida por en perigo a súa vida polo feito da doazón.
A Conselleria de Sanidade ten a disposición das galegas e galegos unha páxina web: //galicia.medulaosea.org que facilita os trámites de rexistro aos potenciais doadores. A doazón tamén pode efectuarse chamando aos teléfonos gratuítos 900100 828 ou 900 102 688.
