O pasado sábado 28 de outubro celebrouse a gala da 46ª edición dos Premios da Crítica Galicia. Como comentou Jorge Mira en certa ocasión, trátase dos ‘Premios Nobel galegos’, uns galardóns nos que se recoñece a labor das galegas e dos galegos que contribúen en diferentes campos ao engrandecemento de Galicia.
O certame Premios da Crítica Galicia está en marcha desde hai moitos anos, exactamente corenta e seis, e agora xa quedan na lembranza as dificultades da súa posta en marcha e dos momentos difíciles que xurdiron ao longo dos anos e que foron superándose con esforzo e dedicación.
Estes premios son unha realidade que vai perdurar no tempo grazas a Bieito Ledo, a súa alma mater, ao que se lle fixo un merecido recoñecemento como presidente fundador. Está claro que Bieito Ledo é un galego de boa cepa que xa forma parte da historia cultural de Galicia por méritos propios, cunha dilatada aportación cultural que inclúe a súa editorial Ir Indo, con centos de obras publicadas en galego e coa titánica Enciclopedia Galega Universal.
Coa ocasión da gala dos Premios da Crítica Galicia 2023, na súa 46ª edición, presidida por Manuel Bragado e cun cartel deseñado por Antón Pulido, ademais do recoñocemento a Bieito Ledo como presidente fundador tamén foron destacados os méritos de Carlos Callón co Premio de Investigación; Berta Davila, en Creación Literaria; Teresa Táboas en Artes Plásticas; Pepe Coira, en Cine e Arte Audiovisual; Teatro Ensalle, en Artes Escénicas; Estrelas no Camiño, en Cultura Gastronómica; Agrupación Astronómica Coruñesa IO, en Iniciativas Culturais e Científicas; e o grupo Tanxugueiras co Premio de Música.
