Trátase só dun “cambio técnico sen ningunha significación” relativo as datas de pago, como recoñeceu o propio rexedor, pero que segundo Caballero obrigará a comezar de cero co procedemento cinco meses despois de iniciarse e cando o documento estaba preto de ser asinado.
O alcalde asegurou este mércores que o Executivo autonómico non ratificou o texto acordado co Concello e co Ministerio senón unha redacción modificada sen advertir diso ás dúas outras administracións.
Así, Caballero considera que o convenio debe ser redactado de novo e para iso ve necesario pedir os informes da Avogacía do Estado, da Secretaría Xeral Técnica do Ministerio de Transición Ecolóxica, do Ministerio de Administracións Territoriais e do Ministerio de Facenda, da secretaría de Estado de Presupostos e Gastos.
O Goberno galego explicou que para avanzar na tramitación do convenio deste estudo de alternativas de abastecemento, a Consellería de Infraestruturas elevouno á súa aprobación polo Consello da Xunta. Ese trámite requiriu do “axuste mínimo de redacción habitual neste tipo de tramitacións e que non alterna nin o fondo do convenio ni os acordos pechados entre as tres administracións”.
“Se o estudo de alternativas para solucionar os problemas de abastecemento de Vigo e da área sur da provincia de Pontevedra non está aínda en elaboración é porque o Ministerio para a Transición Ecolóxica o mantivo bloqueado durante meses”, denuncia a administración rexional.
“Inmediatamente despois da xuntanza de outubro na que se acordou acometer ese estudo, a Xunta elaborou e remitiu ao Concello de Vigo e ao Ministerio unha proposta de convenio para articular esa colaboración. Non obtivo a conformidade do Ministerio ata hai unhas semanas. Durante todos eses meses de espera non se escoitou nin unha palabra de preocupación do alcalde de Vigo polo retraso, a pesar de que se trata de buscar solucións aos problemas estruturais que presenta o sistema de abastecemento de auga no seu municipio”, sinala o Executivo autonómico.