O combinado dirixido por José Ángel Vidal e Guillermo Sande participará en nove categorías individuais e na proba de remudas por equipos.
A lista de convocados abrangue ciclistas de once clubes diferentes: Carla Fernández (Redondela), Andrea García (Cambre) e Noela Saa, Aida González e Antía Martinez (Maceda) nas cadetes ; Mario Fernández (O Rosal), Carlos Canal (Maceda) e Borja Lorenzo (Fundación Óscar Pereiro) nos cadetes; Sara Trigo (Cidade de Lugo) nas júniors; Iván Feijóo (Maceda), Pablo Álvarez (Cambre), Jorge Suárez (Cidade de Lugo) e Guillermo García (Marín) nos júniors; Desirée Duarte (Fornelos) e Irene Trabazo (Meruelo) nas Sub23; Samuel González (Salvaterra) e Raúl Fernández (Fornelos) nos Sub23; Mauro González (Salvaterra) nos Elite; Andrés Calvete (Cambre) nos Máster-30; e Javier de la Fuente (Betanzos) nos Máster-50.
Proba por equipos
A expedición parte este xoves cara Valencia, no día antes do inicio dos campionatos que comezarán este venres coa carreira de remudas por selección autonómicas. A partir das 16:00 horas o sexteto galego estará composto polo cadete Carlos Canal, o júnior Iván Feijóo, o sub23 Samuel González, a sub23 Desirée Duarte, o elite Mauro González e o Máster-30 Andrés Calvete.
Galicia nunca conseguiu a vitoria nesta competición, pero en cinco das oito edicións acadou medalla. Guillermo Sande afirma que “se todo sae ben podemos loitar por estar no máis alto, pero todos sabemos que é unha proba na que unha avaría pode dar ao traste con todo, como nos pasou a nós tan cerca da meta o ano pasado”.
A xornada do sábado abrirase co carreira Máster 50 e 60 (9:30 horas) e continuará coa Máster-40 (10:45), todas as femininas (12:00), a Máster-30 (14:30) e a Sub23 (15:45). Por último, o domingo será a quenda para os cadetes (10:30 horas), júniors (11:45) e elites (13:15)
A referencia para a selección galega sitúase nas tres medallas colleitadas o pasado ano. Na cita que se celebrara en Torrelavega, Iván Feijóo e Irene Trabazo, nas probas júniors, e Javier de la Fuente, na Máster-50, asinaran tres subcampionatos de España.
