O futbolista indicou que «nós estamos nun bo momento, pero eles tamén. Poden desequilibrar o partido en calquera momento e temos que estar moi concentrados e estar finos co balón. Tamén temos que finalizar todos os ataques porque é un equipo moi forte na transición defensa-ataque». O conxunto da capital do Estado encabeza a táboa cos mesmos puntos que a formación viguesa, que é segunda. «En canto a puntos estamos no mesmo nivel. En canto a orzamento e calidade é un equipo superior a nós. O que seguro que non é superior é a nivel de equipo. Nese aspecto estamos moi ben e trataremos de gañar sendo nós mesmos a todo un equipo como o Real Madrid», precisa Sergio Álvarez.
Esta semana o rival é o Real Madrid e, case de forma obrigada, chegan as comparacións co Barcelona. «Son dous rivais diferentes. O Barcelona incomódalle máis non ter o balón, pero o Real Madrid, nalgunhas ocasións, non ten a pelota pero está dominando o partido. Temos que ter claro isto, ademais de ter a posesión, temos que intentar non facer perdas no centro do campo. Agora mesmo igual apostamos máis pola posesión nós», admite o cancerbeiro do Celta.
Cristiano Ronaldo
O conxunto madridista ten a baixa confirmada de Bale para o sábado e tamén é probable que non poida xogar Benzema. Isto multiplica as miradas sobre Cristiano Ronaldo. «Márcalle goles a todos os equipos. Hai que estar concentrados e temos que ter coidado con el, pero tamén cos outros que xogan porque calquera pode meter goles. Será un partido no que teñamos que realizar moitas axudas. O Real Madrid ten moitas alternativas en ataque e tamén baixas. Xogue o que xogue será un equipo perigoso, e temos que ‘entre comiñas’, adaptarnos ó xogo deles, pero sobre todo temos que facer o noso fútbol».
Keylor Navas
Sergio Álvarez analizou a situación do seu homólogo no Real Madrid. «Keylor Navas xa amosou no seu momento no Levante que é un gran porteiro. Pasouno mal ó final do verán, pero faláronme moi ben del e alégrome de que lle vaia ben e non me sorprende o seu rendemento. É un porteiro moi áxil e, tamén, que ten un nivel de concentración moi alto», indicou o porteiro.
Sobre a situación do Real Madrid e a fama de equipo defensivo, o porteiro do Celta explicou que «non creo que sexa un equipo ‘amarrategui’. É dos que leva máis goles na tempada. Creo que é un conxunto sólido e traballado, pos iso encaixa poucos goles». Sergio quere gañar o partido porque desexa que «a xente anime, que nos dea apoio nos momentos complicados, porque é importante. E tamén que podan gozar e vivir unha vitoria. O afeccionado é o que se ten ilusionar, nós temos o obxectivo claro que é asegurar a permanencia canto antes e se a xente se ilusiona por máis quere dicir que o estamos facendo ben».
Os outros porteiros do Celta
Rubén Blanco comezou a adestrar este mércores co grupo tras a súa lesión no ombreiro e Sergio Álvarez precisa sobre un posible aumento da competencia que «para min Rubén é un compañeiro máis e ogallá poida volver canto antes e entrar na convocatoria para o partido. Eu traballo día a día para poñerlle a decisión complicada o adestrador e ése é o seu debate. Eu traballo a diario para xogar. Intento xogar cada semana e o intento facer o mellor posible. Estou contento de facer todos estes partidos. Nuns estiven mellor, noutros igual non estiven tan acertado, pero estou contento do meu nivel e quizais estou indo de menos a máis».
O actual porteiro titular do Celta tamén comentou a convocatoria de Iván VIllar coa selección española sub-19. «Xa o fixen persoalmente e hai que darlle os parabéns a Iván. O Celta está traballando ben a nivel de porteiros, por iso están chegando as convocatorias con España. Que sigan saíndo moitos máis e que a entidade continúe crecendo a nivel de canteira».
