Trátase dun gran espectáculo musical que conecta Cuba e Galicia a través de sons de ambas partes do mundo. Con letras do escritor galego Xosé Neira Vilas, o álbum é resultado dun traballo de dous anos entre o artista galego, ex membro de Milladoiro, e o escritor, e foi gravado na Habana en marzo de 2016. Participan nel algúns dos mellores músicos cubanos como Pablo Milanés, Laritza Bacallao, Miguel Núñez, Osmani Sánchez, Jorge Leliebre, César López… e da parte galega, figuras destacadas como Nando Casal (Milladoiro) ou Carlos Calviño.
O concerto, organizado pola a Vicerreitoría de Extensión Universitaria dentro da programación deste outono-inverno, ofrecerá a oportunidade de gozar do directo deste músico que comezou a súa andaina como arpista do grupo Milladoiro (2000-2009) e conta xa con catro discos en solitario: Lendas Douradas, Maxicamente vello e Donoso do noso destino, ademais do último, Son galego, Son Cubano.
Roi Casal Son Galego, Son Cubano Data: Xoves, 10 de novembro Hora: 18.30 h // Entrada libre e gratuíta ata completar aforamento Lugar: Teatro Cidade Universitaria. Universidade de Vigo. |