A programación do ciclo de música antiga ‘Un camiño ben temperado’ continúa este luns, 5 de setembro, co concerto de Ensemble Alletamento. Baixo o título ‘Música ibérica para a nobreza do século XVIII’, os músicos Mario Braña e Elsa Pidre ofrecerán un repertorio para violín e violonchelo barrocos.
O concerto somerxerá ao público na sociedade española e portuguesa do século XVIII a través da música que se escoitaba na Igrexa, a corte, as casas da nobreza e os teatros. Un percorrido por este mundo a través dun programa composto por obras de Carlos Seixas, Francesco Corseli ou Doménico Scarlatti.
A cita terá lugar ás 21.00 horas na Colexiata de Santa María. A entrada é de balde e libre ata completar a capacidade existente.
Co programa de ‘Un camiño ben temperado’, a Orquesta Clásica de Vigo procura xerar un espazo de troco e posta en común arredor da interpretación historicamente informada do repertorio ibérico e as súas ligazóns co exterior. Ademais, a orquestra promove a conexión entre artistas galegos e portugueses a través do patrimonio histórico do sur da provincia de Pontevedra, nun espazo correspondente coa diocese Tui-Vigo.
Programación
- 5 de setembro, ás 21 horas, na Colexiata de Santa María (Baiona). ‘Música ibérica para a nobreza do século XVIII’, con Mario Braña (violín barroco) e Elsa Pidre (violonchelo barroco)
- 7 de setembro, ás 20 horas, na Igrexa de Santa Uxía de Mougás (Oia). ‘Triosonatas di chiesa e camera’, coa agrupación I Colori Dell’Armonia
- 9 de setembro, ás 20 horas, na Igrexa de Santa María (A Guarda). ‘Influências ibéricas’, con Daniel Oliveira (clavecín)
- 11 de setembro, ás 18:30 horas, na Catedral de Tui. ‘Requiem para o mosteiro de Santa Clara’, coa agrupación Metáfora das Flores baixo a dirección musical de Magna Ferreira.
