Este mércores, 30 de outubro, celebrarase, ás 20:00 horas, na Sala Kominsky de Vigo, a presentación de «Anos 80. Movida, Atlantismo, Vangardismo, Underground», de Fernando Fernández Rego.
Un libro editado por Galaxia que ao longo de 360 páxinas fai un percorrido por esa década intensa e rupturista que marcou o futuro da música e das artes en Galicia. Para acompañar ao autor na presentación, no local sito na Rúa dos Irmandiños, 3, estarán ademais Teo Cardalda (Golpes Bajos) e Javier Moreda (Tintimán).
Así, aínda que a música é o eixe central do libro, fanse paradas na contracultura, o “faino ti mesmo”, os fanzines, o audiovisual, a poesía e a plástica. Porque fala de tempos novos e efervescentes en que proliferaron os camiños alternativos e subterráneos, e onde ten lugar unha transformación radical, tanto da sociedade como das artes.
O autor, Fernando Fernández Rego (Ferrol, 1979) é licenciado en Química pola USC e traballa como profesor de educación secundaria. Ademais de administrar a web musical LaFonoteca.net, coordina a sección de música da revista Grial, escribe para Mondosonoro, Luzes e Rockdelux e colabora con múltiples plataformas, tanto dixitais como impresas.
Publicou a novela Desorden (2009), un tratado de existencialismo pospunk, e tocou o relato e a poesía en Blues From A Gun. Secuencias interiores (2011). Deu ao prelo ensaios como o libro-CD 50 Anos de pop, rock e malditismo na música galega (2010) e Galicia en clips (2012), este último xunto a Pablo Portero; e biografías, como o da banda de Lugo Los Contentos, Cuando Ríes. Los Contentos (Unos Malditos Pioneros del Garage) (2014), en colaboración con Piti Sanz, e a de Andrés do Barro, Andrés do Barro. Saudade (2015).
En Editorial Galaxia publicou Unha Historia da música en Galicia 1952-2018 (2019) e Suso Vaamonde. A canción libre e comprometida dun pobo (2022).
Xunto a Sergio Peck (Carrero Bianco) é o responsable do selo discográfico Ferror Records.
