«Rosalías» achegará este mércores textos sobre Rosalia de Castro para contribuír a espallar unha imaxe renovada na que a padronesa xa non é esa muller sensibleira e romanticona, senón unha intelectual feminista comprometida coa análise da sociedade do seu tempo. Roi Vidal e Laura Ponte percorrerán a vida e a obra de Rosalía a través dos seus momentos máis significativos, nunha narración chea de poesía, pensamento, música, símbolos, humor e aire esco.
Comercios do Clavario
Este 24 de febreiro os comercios do Calvario, e todo Vigo, homenaxean a Rosalía de Castro. O Concello, en colaboración coa Asociación de Comerciantes e Empresarios xunto co mercado do Calvario, van encher os escaparates do Calvario con versos da escritora.
Esa mesma mañá, a partir das 11.30h percorreranse os comercios deténdose para ler os versos; posteriormente haberá unha lectura compartida de poemas de Rosalía. Lectura que se chover faremos no propio mercado.
Dinamización Infantil
Nos espazos de Dinamización Infantil do Concello de Vigo, (Casa da Xuventude e Pavillón de Coia), realizaranse diferentes actividades e xogos para conmemorar esta data e que os nenos coñezan máis da súa vida e obra:
1. Lectura dalgunha das súas poesías e Asamblea ¿Coñecemos a Rosalía?.
2. Ilustración dun dos seus poemas.
3. Manualidade: marcapáxinas coa imaxe de Rosalía e un anaco do seu poema e collage da imaxe de Rosalía.
4. Xogo: rompecabezas dos versos dun poema. A través de diferentes probas terán que conseguir os diferentes versos ata formar o poema enteiro.
Esta actividade levarase a cabo en horario de 16:30 a 20:30 e participaran os usuarios/as dos espazos de Dinamización Infantil de idades comprendidas entre os 4 e 12 anos.
«Rosalía, feminista»
Este martes o Centro de Documentación e Recursos Feministas acolleu o faladoiro «Rosalía, feminista» que impartiu Anxo Angueira, presidente da Fundación Rosalía de Castro. Actividade que se enmarcou dentro dos actos que o Concello de Vigo organiza con motivo da celebración do Día de Rosalía o día 24 de febreiro
«Porque aínda non lles é permitido ás mulleres escribir o que senten e o que saben». No ano 1859, Rosalía de Castro explicaba así un dos «leitmotiv» da súa obra, e facíao no prólogo da súa primeira novela, «A filla do mar».
Para Pilar García Negro, autora da definición de Rosalía de Castro como «feminista na sombra» Rosalía de Castro (1837-1885) é, sen dúbida, artífice esencial da historia contemporánea de Galicia. Ela foi a súa voz e o seu intérprete principal. Ao seu patriotismo une unha preocupación constante pola condición e a sorte das mulleres, que se fai medular en toda a súa obra. O seu feminismo é correlato da súa posición vital, filosófica e política na vida.
Anxo Angueira Viturro é filólogo, escritor e estudoso da literatura galega. É o actual presidente da Fundación Rosalía de Castro, con sede na Casa Museo de Rosalía, desde o 1 de xuño de 2012.
