A delegada territorial da Xunta de Galicia en Vigo, Ana Ortiz, participou este venres na gala de entrega do II Premio Internacional de Poesía Carlos Oroza creado co apoio do Goberno galego para celebrar o centenario do nacemento do escritor. Durante o acto celebrado no Museo do Mar de Galicia, en Alcabre, a representante autonómica salientou o “carácter internacional” dos premios e a súa “capacidade para traspasar fronteiras”.
“A chegada de Évame Oroza é o colofón cultural ao traballo de recuperación material do noso barrio histórico e a día de hoxe podemos presumir de que o Premio Internacional Carlos Oroza, nacido no corazón do noso Casco Vello, conta coa participación de escritores de 35 países. Non hai mellor galardón!”, destacou.
No acto foron entregados os premios á galega Mariña Pérez e a madrileña Ángela Álvarez como gañadoras da segunda edición do premio literario, nas modalidades de galego e castelán, respectivamente, ao que se presentaron traballos de Galicia (120), do resto de España (488) e unha importantísima representación internacional (403). Os premios teñen unha dotación de 6.000 euros cada un e os galardoados recibiron unha figura de Oroza realizada en bronce pola artista Cuqui Piñeiro.
A entrega de premios tivo lugar no Museo do Mar e ademais da delegada territorial tamén estiveron presentes a vicepresidenta da Deputación de Pontevedra, Luisa Sánchez; o presidente da asociación Évame Oroza, Xabier Romero, e a filla do poeta, Mariña Oroza. A gala de entrega dos premios contou co dúo Cintaadhesiva, que puxo a nota musical nun evento cheo de poesía e arte.
Modalidade de castelán
A obra “Notas de Cereté”, de Ángela Álvarez Sáez, foi elixida como gañadora do Premio Carlos Oroza na modalidade de castelán. O xurado, formado por Manuel Bragado, Rexina Vega e María Xosé Porteiro, destacou da obra que “baixo a forma de diario unha voz feminina indaga no suxeito poético contemporáneo e dende unha perspectiva de muller explora a relación entre corpo e literatura”. Destacan tamén a unidade e vertebración do proxecto, cunha estrutura sólida e ao mesmo tempo variada, flexible e sorprendente.
Ángela Álvarez Sáez (Madrid, 1981) é licenciada en Dereito e avogada. No ano 2005 formou parte da Fundación Antonio Gala para Jóvenes Creadores, onde obtivo unha bolsa de creación literaria.
Modalidade de galego
O poemario “Unha aria no asedio”, de Mariña Pérez Rei, foi a obra elixida por unanimidade polo xurado da modalidade de galego, composto por Silvia Penas, Patricia Meira e Samuel Merino. Na acta, o xurado valora “que é un poemario cun código poético traballado e certeiro, que propón un transunto entre a arte, a lingua, a música e a vida mesma. Rico en imaxes e cun ritmo engaiolante que tensa o fío do principio ao fin, coma unha arpa ben afinada que deixase múltiples notas para tocar cada milímetro do cosmos”.
Mariña Pérez Rei é docente e escritora amesá, con unha traxectoria que transita entre a poesía, a narrativa breve e a colaboración xornalística. En 2005 recibe o Premio Eusebio Lorenzo Baleirón polo poemario Fanerógama, e un ano despois o Premio Manuel Lueiro Rey coa novela curta Canícula. Entre os seus títulos poéticos figuran tamén Apuntamentos para un cuarto confuso e cambiante (edición artesanal) e Paquidermo.
Mellor iniciativa musical
O “Recoñecemento á mellor iniciativa musical de divulgación da poesía” foi concedida a Mercedes Peón pola súa traxectoria musical e creadora, polo seu labor como compiladora e transmisora do legado das mulleres anónimas que mantiveron vivo o canto, a música e o baile en Galicia.
Destaca tamén pola súa brillante carreira como compositora e intérprete, marcada por un espírito innovador que soubo conectar a tradición coa contemporaneidade, explorando novos camiños sonoros e expresivos dende unha clave profundamente persoal, comprometida coa sociedade e co feminismo. O premio non ten dotación económica e consiste nunha peza realizada ex profeso polo artista Xabier Magalhães, así como unha figura de Oroza feita en bronce pola artista Cuqui Piñeiro.
