Gadis presentou no Centro Galego de Arte Contemporánea (CGAC) as accións que leva a cabo para conmemorar o Día das Letras Galegas neste 2025. A cadea de supermercados rende a súa propia homenaxe ás cantareiras en Foliada!, un orixinal proxecto artístico para o que reuniu a cinco escritoras e a cinco ilustradoras de Galicia, que plasmaron a súa particular visión da cultura popular galega. Esta edición especial consta de cinco láminas, que combinan literatura, música e ilustración e recóllense nunha caixa deseñada a modo de vinilo musical.
Ledicia Costas, Yolanda Castaño, María Solar, María Lado e Esther F. Carrodeguas son as autoras desta visión moderna das históricas cantigas, que se transmitiron de xeración en xeración, fundamentalmente, de forma oral. En cada lámina recóllese unha composición tradicional, o texto coa interpretación contemporánea e unha ilustración, obra das artistas Laura Tova, Laura Mahía, Xoana Almar, María Montes e Iria Fafián.
Gadis regalará 30.000 unidades de Foliada!, ata fin de existencias, nos supermercados de Galicia o vindeiro venres 16 de maio. Tamén se repartirán 40.000 bolsas da compra de papel reciclado cunha chiscadela ás figuras das Letras Galegas homenaxeadas este ano: as pandereteiras de Mens, Adolfina e Rosas Casás, e Eva Castiñeira.
Na web www.gadisletrasgalegas.gal pódense descargar a versión dixital das láminas e escoitar as pistas musicais cedidas, entre otros, polo Museo do Pobo Galego.
Evento cultural
“Quero destacar o papel de Gadis na súa implicación e compromiso coa nosa cultura, é importantísima esa conexión entre a actividade económica e o ámbito social”, declarou o conselleiro de Cultura, Lingua e Xuventude, José López Campos neste evento cultural presentado pola periodista Susana Pedreira, que tamén reuniu no CGAC ao secretario Xeral da Lingua, Valentín García, así como ao director de Comunicación de GADISA Retail, José Luis Fernández Astray, á directora de Marketing e RSC, Melisa Pagliaro, e á coordinadora de Marketing Dixital e Contidos, Alexandra Kuntz, entre outros.
Durante o acto realizouse un percorrido polas iniciativas predecesoras a Foliada!, coas que conmemoraron os últimos anos o Día das Letras Galegas. Accións con recoñecemento internacional entre as que podemos atopar unha antoloxía de poetas noveis, versos de artistas galegos nas rúas de diferentes vilas e cidades, un fanzine e un caderno de actividades co que aprender sobre a lingua e cultura galega.
Máis de vinte anos de compromiso coa cultura galega
Con raíces 100% galegas, Gadis está comprometida coas súas orixes a través da promoción cultural. Un apoio á cultura nas súas diferentes manifestacións como elemento vertebrador do territorio e da súa dinamización socioeconómica. Máis do 33% das accións do seu plan de Responsabilidade Social Corporativa pertence a esta área de actuación. Unha das súas firmes apostas no ámbito literario é impulsar a lingua galega e a edición de libros neste idioma: 430.000 exemplares nas últimas dúas décadas, tanto de autores noveis como doutros consagrados.
