A organización do Festival de Cans decidiu adiar a celebración da décimo sétima edición do certame, prevista inicialmente para finais de maio, e trasladala para a primeira semana do mes de setembro, en concreto do mércores 2 ao sábado 5 de setembro. Aínda que inicialmente se pensou en agardar ata despois de Semana Santa para confirmar o aprazamento, a organización tomou esta decisión de forma urxente ante a preocupante evolución da epidemia do coronavirus, crendo que nestes momentos era “inviable” e “imprudente” manter as datas previstas para finais de maio.
Ademais, de non darse as condicións sanitarias axeitadas, sobre todo para que as veciñas e veciños abran os seus ‘jalpóns’ aos visitantes, o certame precisa varias semanas de antelación para pechar os contidos, as convidadas e os convidados e os billetes das persoas que viaxan a Galicia desde diversos puntos de España, de varios países de Europa e mesmo de América, como é o caso desta edición. Ao mesmo tempo, as restricións de mobilidade entre países e o peche de espazos aéreos debido á crise do COVID-19, xeraban nestes momentos unha enorme incerteza, dificultando a toma de decisións con respecto á programación.
Nestes momentos, o festival segue a traballar con normalidade no proceso de selección de curtametraxes a concurso, mais tamén na reordenación de moitos dos contidos, en pechar as novas datas con artistas xa contactados ou en reestruturar varias das contratacións do persoal, ao ser inviable manter as contratacións continuadas nestes momentos ata o mes de setembro, máis alá da perda que supón a cancelación de varias viaxes previstas para o mes de maio. O evento comunicou esta decisión nas últimas horas ás institucións que apoian o festival, patrocinadores e colaboradoras e colaboradores.
Proxección de curtametraxes nun dos ‘jalpóns’
A organización agradeceu a boa disposición de todas e todos nestas circunstancias difíciles, pero especialmente das veciñas e veciños de Cans que prestan os seus ‘jalpóns’ e os seus chimpíns, que en todo momento están facilitando e apoiando este complexo cambio de datas. Con esta decisión, o Festival de Cans intenta poder salvar o certame, considerado o máis importante evento cultural de todos os que se celebran en Galicia nun entorno rural, ao que o pasado ano acudiron más de 15.000 persoas durante catro días, esgotando todas as prazas hoteleiras da comarca e xerando 132 contratacións laborais, cunha estimación dun impacto económico superior ó medio millón de euros.
Os responsables poranse en contacto con todas as persoas que mercaran a súa entrada de xeito anticipado na oferta lanzada no pasado Culturgal, dándolles as opcións da devolución do diñeiro ou manter a compra vixente nas datas de setembro.
