O Festival Primavera do Cine quere deste xeito recoñecer “a súa ampla traxectoria e o seu compromiso no eido audiovisual”. De feito, foi un dos creadores e directores da Escola de Imaxe e Son de A Coruña (1990-1998), dirixiu tamén a Academia Galega do Audiovisual (2006-2009) e foi un dos ideólogos de Chanfainalab, un certame cinematográfico creativo e participativo feito no concello de San Sadurniño (Ferrol) que naceu en 2014 e no que segue participando como co-organizador.
Ademais, con esta mención honorífica tamén se quere premiar “a súa incansable labor en favor do cinema e a historia audiovisual galega” e o “apoio que ofrece ás novas xeracións e, por suposto, ao traballo didáctico que fai día a día co obxectivo de dar a coñecer o cinema e a historia da comunidade galega”.
Manolo González estivo detrás dunha infinidade de proxectos. Así, foi responsable da Área de Cine e Vídeo da Dirección Xeral de Cultura, onde implantou as primeiras axudas públicas ao cine e vídeo galegos e entre 1984 e 1985 estivo ao fronte da Videoteca de Galicia, que despois se convertería no CGAI. Ademais, tamén traballou en VideoVoz TV, Dygra Filmes e realizou diversas labores de investigación.
Así mesmo, hai que destacar os numerosos premios que recibiu, entre os que destacan en 2003 o premio dos Mestre Mateo José Sellier pola posta en marcha da Escola de Imaxe e Son, en 2014 o premio honorífico Fernando Rey, tamén dos Mestre Mateo, precisamente por esa “paixón que ten ao mundo do audiovisual galego” ou en 2016 premio de honra de CREA (Asociación de directores creadores audiovisuais de Galicia) polo seu compromiso cos directores e creadores audiovisuais galegos.
En definitiva, a mención honorífica da oitava edición do Primavera do Cine recae este ano nunha persoa comprometida co cinema galego, cunha traxectoria vinculada ao mundo audiovisual de máis de 30 anos e que ao que aínda lle queda moito por facer.
O festival
A inauguración da oitava edición do Primavera do Cine celebrarase o 1 de maio no barrio do Calvario e será un evento de balde. Doutra banda, ademais da entrega do premio de honra a Manolo González, tamén se proxectará un filme da sección oficial.
Deste xeito, o Primavera do Cine busca chegar a todos os barrios vigueses posibles para continuar coa súa labor de espallar a cultura audiovisual galega e lusófona dun xeito aberto e accesible a todos.