Asemade, participará no Encontro Arraianos, uns encontros que nacen co obxectivo de promover a creación de redes de colaboración e intercambio entre cineclubs e festivais de cine de Galicia e Norte de Portugal, España e Brasil, contribuír a difundir a identidade arraiana e estimular o diálogo cultural e por riba das fronteiras.
Na inauguración, o certame concederá a mención honorífica a unha das produtoras máis prestixiosas do noso país: Chelo Loureiro, que será homenaxeada pola súa traxectoria profesional, pola súa loita constante na visibilización das mulleres no eido audiovisual, o seu apoio ós novos talentos e por buscar que o cine de animación alcance o recoñecemento que merece.
Ademais, na gala de presentación poderase ver un dos filmes documentais máis representativos do cinema do Brasil, país convidado este ano ó festival, ‘Cabra, marcado para morrer’, un filme que leva a gran pantalla a historia das Ligas Campesiñas do norte de Brasil, contrarias á reforma agraria e que reclamaban unha mellora nas súas condicións de vida. A cinta céntrase na figura de João Pedro Teixeira, líder campesiño asasinado en 1962, e a vida dos seus familiares.
Así mesmo, o festival participará no VII Encontro Arraianos, ó que se poderá asistir a partir das 11.00 horas no Instituto Camões de balde. Na xuntanza, que se celebrará coa colaboración do Primavera do Cine, estarán os representantes dos cineclubs, festivais de cinema e as universidades que levan xa un par de anos traballando na desfronteirización con «insistencia arraiana».
A programación
O mércores comezará ás 18.00 horas no auditorio do Concello de Vigo cunha sesión de curtametraxes de animación entre as que destacan ‘É preciso que eu diminúa’, un videoclip realizado polo recoñecido Pedro Serrazina; ‘Surpresa’, de Paulo Patrício, que aborda o cancro infantil a través dunha sincera conversación entre nai e filla e ‘The neverending wall’, un filme de Silvia Carpizo que ten como produtora a Chelo Loureiro e que conta cun nomeamento ós Goya de 2018.
Paralelamente, no Camões ás 18.00 terá lugar o outro pase de curtas de animación no que se poderán ver, entre outros títulos, ‘Áuga mole’, de Laura Gonçalves, que reflicte o problema da desertificación no interior de Portugal ou a comedia negra ‘Viaje a pies’, de Khris Cembe.
Xa ás 19.30 horas exhibirase un bloque de curtas lusófonas con filmes como ‘Katharsis’, de Mirela Kruel, unha curta de grandes toques teatrais que busca reflexionar sobre as verdades que moitas veces ocultamos; ‘Mãe querida’, de João Silva, que narra a historia de Matilda, unha adolescente maltratada pola súa nai que decide pedir axuda a unha bruxa ou ‘O vestido de Myriam’, de Lucas H. Rossi, que mostra a vida dunha parella de anciáns en silencio.
O último bloque de curtas no Camões será ás 21.00 horas, onde se poderá ver ‘Deusa’, de Bruna Callegari, a historia dunha recadadora na peaxe da illa na que vive e que comezará a sentirse diferente cando ve unha balea encallar na praia; ‘Em algum lugar, amanhã’ de André Siqueira, unha curta que fala da atracción súbita que pode xurdir entre descoñecidos e sobre como cada decisión que tomamos pode marcar a nosa vida para sempre e ‘O menino e o louco’ de Julia Ferreira na que un neno viaxa, reencontra as súas amigas xemelgas e pasa a frecuentar a súa estraña casa, tentando protexelas do seu pai insán.
O día rematará coa proxección ás 22.30 horas no Concello de ‘Historia dun Satélite’, das Also Sisters, un filme que ten todos os ingredientes para sorprender e que abarca desde a comedia negra ó cinema de aventuras, a ciencia ficción e o cine bélico.
Cine miúdo
Outra das actividades que se celebrarán dentro do Primavera do Cine é o Cine Miúdo. Deste xeito, entre o 9 e o 11 de maio, os cativos poderán ver diferentes pezas de cine musicalizadas ó vivo grazas ó trío Casperverk e ata poderán substituílos e ser eles mesmos os encargados de harmonizar os filmes durante uns intres.
Esta nova edición realizarase no teatro García Barbón, que cederá o seu espazo para apoiar ó festival e para o desfrute dos máis pequenos da casa. Sen dúbida trátase dunha actividade infantil cunha gran traxectoria e aceptación entre os docentes, pola súa valor pedagóxica e que ademais chea de ledicia a tódolos nenos que participan dela.
Prezos
Cada bloque de curtas terá un custo de 2’50 euros, as longametraxes serán a 3,50 euros e o acceso a gala inaugural a 4 euros. Todas as entradas poderanse adquirir na sede correspondente desde media hora antes de comezar a proxección.
