O 29 de novembro marcou un antes e un despois no panorama audiovisual galego coa estrea de Bibopalula, a primeira serie musical de debuxos animados integramente en galego. Este innovador proxecto, creado por Laura Mahía e Andrés Mahía e producido por Undodez, está especialmente deseñado para nenos e nenas de entre 3 e 6 anos. Consta de 55 capítulos de cinco minutos que combinan música, aprendizaxe e entretemento, nos que os pequenos descubrirán o mundo natural a través das aventuras da Banda do Bosque.
Os protagonistas son catro carismáticos paxaros: Robin, o paporrubio; Merli, o merlo; Pegui, a pega; e Carpin, o carpinteiro. Cada episodio segue as súas peripecias mentres exploran os ciclos da natureza, dende a chegada do inverno ata o retorno das cegoñas. A través de pequenas historias cargadas de valores como a amizade e o respecto polos ecosistemas, a serie busca espertar a curiosidade infantil e fomentar o amor pola contorna natural.
A música, un piar fundamental
Un dos grandes atractivos de Bibopalula é a súa aposta musical. Cada episodio finaliza cunha canción orixinal interpretada pola Banda do Bosque. Estos temas, compostos por Santi Jul e Iván Laxe, estarán dispoñibles en plataformas de streaming, permitindo que os nenos prolonguen a experiencia máis aló da pantalla.
O elenco de voces que dá vida aos personaxes inclúe a destacadas figuras do audiovisual galego como Melania Cruz, Marta Lado, Iria Lamas, Marita Martínez e Xosé Antonio Touriñán, achegando unha calidade interpretativa que conecta coas raíces culturais de Galicia.
Un proxecto 100 % galego con ambición internacional
Producida por Undodez en colaboración coa Televisión de Galicia, Bibopalula conta co apoio da Xunta de Galicia a través da Axencia Galega das Industrias Culturais. A serie estreouse en exclusiva na plataforma dixital infantil Xabarín e na aplicación móbil do mesmo nome, cos primeiros 20 episodios dispoñibles desde o venres 29 de novembro.
Este ambicioso proxecto non só busca conquistar aos máis pequenos en Galicia, senón que tamén aspira a expandirse a outros territorios e linguas mediante acordos con diferentes operadores internacionais.
Máis que unha serie
Pero Bibopalula vai máis aló de ser unha simple serie de debuxos, ao seu ao redor destacan iniciativas como a publicación dun conto infantil, contido adicional en Youtube, unha aplicación móbil específica e a participación en plataformas de música. Ademais, a partir de xaneiro lanzarase unha unidade didáctica para colexios, que incluirá visitas dos personaxes a centros educativos, reforzando así o seu enfoque educativo e lúdico.
Ademais, esta pasada fin de semana, a serie presentouse no Culturgal, en Pontevedra, cun espazo propio no que se deu a coñecer a familias e visitantes. Este evento converteuse nunha oportunidade única para que os máis pequenos coñecesen de preto aos personaxes mergullándose no universo da Banda do Bosque.
Un paso adiante para o audiovisual galego
Con Bibopalula, Undodez reafirma o seu compromiso coa creación en lingua galega e abre novas portas no ámbito do entretemento infantil. Este proxecto non só cobre un baleiro no panorama audiovisual, senón que tamén reivindica o galego como unha lingua contemporánea e versátil para as novas xeracións.
Se queres descubrir as aventuras de Robin, Merli, Pegui e Carpin, visita bibopalula.gal, accede á aplicación Xabarín ou mergúllache no seu mundo musical a través das principais plataformas dixitais. Galicia xa ten a súa primeira gran serie de debuxos animados en galego, e promete ser inesquecible para nenos, pais e educadores.
