A asociación Évame Oroza inicia os actos organizados arredor do Día das Letras Galegas coa presentación do libro ‘Canta, miña compañeira. O legado das cantareiras de María Lado’, recentemente publicado por Edicións Xerais. No acto, que será hoxe mércores, 14 de maio, a partir das 20:00 horas no local da asociación, a autora estará acompañada pola poeta e artista Franchesca d’a Silva.
A obra de María Lado, aínda que está dirixida ao público xuvenil, destaca por ofrecer unha panorámica entretida e accesible sobre a historia da celebración do Día das Letras Galegas que tamén pode gozar o público adulto.
O libro sitúa no espazo e no tempo ás figuras de Adolfina Casás, Rosa Casás, Eva Castiñeira, Manuela Lema, Prudencia Garrido e Asunción Garrido, as homenaxeadas pola Real Academia Galega este ano no Día das Letras Galegas.
Na presentación, a autora e Franchesca d´a Silva conversarán sobre os temas principais do libro, que pretenden ser un achegamento non só ás cantareiras,
senón tamén a toda a cultura popular que as mulleres mantiveron viva durante séculos como os contos, os xogos ou os saberes.
María Lado (Cee, 1979) é escritora, maiormente poeta, aínda que ten publicado tamén novela, relatos, contos para crianzas e textos de teatro. Formou parte do Batallón Literario da Costa da Morte, onde comezou a recitar e publicar, participando en varios títulos do colectivo.
O seu interese pola interpretación e a oralidade levárona a experimentar na poesía escénica a través de diferentes proxectos. Foi unha das creadoras do
colectivo Poetas da Hostia, xunto a Ledicia Costas e Daniel Landesa, e do dúo Aldaolado, con Lucía Aldao, que estivo activo entre 2005 e 2024.
Escribiu tamén literatura infantil e xuvenil, destacando a obra Caramomia (escrita a oito mans con Ledicia Costas, Daniel Landesa e O Hematocrítico).
- Día: 14 de maio
- Hora: 20:00 horas
- Lugar: Local da asociación Évame Oroza (Subida á Costa, 5 – Praza do Abanico – Casco Vello Alto de Vigo)
