Abel Caballero e Carmela Silva presentaron hoxe martes unha nova ferramenta na que se pode acceder a toda a información relativa a un proxecto que segundo o propio alcalde «está a mudar a faciana da cidade» e representa «unha mostra do talento de artistas xa consolidados e unha oportunidade de dar a coñecer a toda a cidade o traballo de artistas noveis».
O pintado de murais de esta terceira edición xa comezou cunha acción na rúa Coruña número 9 que se estima que concluirá o próximo dia 18 de xullo. Durante o mes de xullo, e ata o 15 de agosto, levaranse a cabo outras intervencións en rúa Florida, Avenida Beiramar, Colexio Niño Jesús de Praga, escaleiras entre rúa Romil e Avenida das Camelias, rúa Doutor Corbal, Pavillón do Carme, Pavillón de Bouzas, Avenida de Castelao, túnel da rúa Ourense, escaleiras entre Pi y Margall e Torrecedeira, e rúa Eduardo Cabello. Asimesmo se levarán a acabo proximamente outros tres murais no Centro Comercial Coia 3, no parque de Navia e no muro da Igrexa de Fátima.
Caballero confirmou que, dado o éxito acadado por esta campaña de embelecemento da cidade, esta terá continuidade en futuras edicións marcándose como obxectivo chegar a cifra de 100 obras nos próximos anos.
Estas obras estarán firmadas por diferentes artistas locais e nacionais como: Delio Rodríguez, María Romero, Pinche, Maria Jose Pulido. Teresa Irisarri, Silvia Rodríguez Pena (SAX), Noel Peres Fungueiriño, Elara Elvira e Ana Santiso, Iria Blanco e Pedro Sardiña. Ademais nesta edición haberá dous artistas internacionais convidados: Hazul e Mona Car o que demostra o éxito internacional desta iniciativa.
O alcalde tamén anunciou que todos os murais que se levan feito nas dúas anteriores edicións e os de esta terceira recibirán un tratamento especial para garantir a súa durabilidade e preservar asi un bo estado de conservación «durante alomenos 100 anos».
Caballero e Silva destacaron tamén que esta nova web (http://ciudaddecolor.vigo.org/), dispoñible en galego, español e inglés, ten como obxectivo dar a coñecer tanto os cidadáns de Vigo como a quen nos visitan toda a información das obras, da súa localización exacta, e os datos das artistas e os artistas que as asinan.
