O galego Olmo Blanco gaña a Bienal de Pintura do Eixo Atlántico

Unha pintura en acrílico sobre madeira tallada do galego Olmo Blanco Fuentes conquistou o primeiro premio da XI Bienal de Pintura do Eixo Atlántico, inaugurada o pasado 30 de outubro, en Viana do Castelo.

A exposición reúne 29 traballos inéditos de artistas naturais ou residentes no Norte de Portugal e Galicia, seleccionados entre máis de 100 traballos admitidos a concurso.

O presidente do Eixo Atlántico, Ricardo Río, que presidiu a inauguración da exposición, subliñou que a Bienal «é a marca da Eurorrexión, que demostra que a través da cultura pódense aproximar os pobos, e dar a coñecer a realidade de cada territorio».

Ricardo Río, tamén presidente do Concello de Braga, afirmou que este é un evento «para continuar no futuro ofrecendo oportunidades aos novos artistas para exhibir os seus traballos, de forma itinerante, por toda a Eurorrexión».

O secretario xeral de Cultura da Xunta de Galicia, Anxo Lorenzo, tachou de «prioritaria» a cooperación cultural entre os dous territorios, non só para os artistas plásticos, senón en todas as vertentes da creación artística». Esta exposición, subliñou, “permite dar a coñecer artistas emerxentes do Norte de Portugal e de Galicia e fomentar a creatividade, o diálogo, e a comunicación entre os artistas dos dous lados da fronteira».

A inauguración contou coa presenza de numeroso público entre os que se atopaban varios dos artistas seleccionados entre as 29 obras que forman parte da XI Bienal de Pintura do Eixo Atlántico.

Presente até final de novembro no Museo de Artes Decorativas, de Viana do Castelo, a XI Bienal de Pintura percorrerá, até abril de 2017, varios municipios da asociación transfronteiriza.

Organizada polo Eixo Atlántico xunto á Fundação dá Juventude (FJ) de Portugal, a Secretaría Xeral de Cultura da Xunta de Galicia, «é a única exposición itinerante entre dous países da Unión Europea e pretende ser un espazo de promoción e intercambio de novos artistas da Eurorrexión», en palabras do Secretario Xeral da entidade, Xoán Vázquez Mao.

Os premios entregados na inauguración foron:

Primeiro Premio á mellor obra da XI Bienal á obra “S/T” de Olmo Blanco Fuentes (Galicia)

Segundo Premio de autor portugués á obra “The first date” de Rui Sousa

Segundo Premio de autor galego á obra “Non teño nada” de Raquel Martínez Ortíz

Premio Novos Talentos Luso-galaicos á obra “Lady by the sea” de Diogo Castro Nogueira dá Costa

Mención de honra á obra “Somos erros na resaca V” de Anaí Lago

Mención de honra á obra “Série III, Construção II” de María de Fátima Teles dá Silva