A alcaldesa de Mos e candidata á Alcaldía polo PP mosense, Nidia Arévalo, presentou o proxecto de remodelación da contorna da igrexa de San Miguel de Pereiras xunto co alcual concelleiro de goberno da parroquia e número 4 da candidatura popular dos vindeiros comicios electorais, Leo Costas.
Arévalo e Costas informaron de que xa se iniciaron os trámites e conversas co Bispado para poder levar a cabo este fermoso proxecto incluído no programa electoral para a lexislatura 2023-2027 do PP de Mos.
Os traballos que se desenvolverían consisten na pavimentación do ámbito, reformulo de instalacións urbanas, así como a substitución da rede de iluminación pública, a adecuación da rede de pluviais, o soterramento da rede eléctrica e rede telefónica, axardinamento e arboledo, así como a dotación de mobiliario urbano.
O ámbito de actuación está formado pola contorna inmediata da igrexa de San Miguel de Pereiras, onde conflúen a estrada Tameiga-Pereiras e o camiño de Pazos, do que se inclúe no ámbito do proxecto un tramo de 165 metros de lonxitude do mesmo; así como o «torreiro» ou chaira na contorna inmediata do atrio da igrexa, onde se sitúan o cruceiro e a fonte; e parte da superficie da parcela situada ao Leste do torreiro, nun nivel inferior. A superficie total do ámbito é de 5.815,89 m2.
Con este proxecto preténdese priorizar o uso peonil do espazo público, convivindo co automóbil, xerando espazos e anchuras suficientes e adecuadas para os usuarios, tanto para estancia como para desprazamentos, incrementando a comodidade e a seguridade. Exponse a plataforma única como solución idónea de convivencia entre o vehículo e o peón e como formulación óptima do espazo público priorizando o uso peonil.
Búscase aproveitar os recursos existentes no ámbito como estratexia produtiva, conservando instalacións existentes de iluminación pública, rede de pluviais, firmes existentes etc. E reducir a velocidade de circulación do tránsito rodado a 30 Km/h co fin de aumentar a seguridade peonil e permitir, deste xeito, a prioridade do peón neste espazo público e a súa convivencia co vehículo. e) e establecer limitacións físicas ao tráfico rodado mediante tratamentos de pavimentos, situación estratéxica de arboledo e mobiliario urbano, como medidas de acougado de tráfico co fin de que actúen como elementos disuasorios para o condutor.
