Os controis nas zonas fronteirizas con Portugal contarán cun novo reforzo desde este martes. As Forzas Armadas colaborarán coa Garda Civil para supervisar que se cumpren as restricións de mobilidade nas estradas. Un mando terrestre do Exército poñerase a disposición da Comandancia de Pontevedra para mellorar os traballos de supervisión de acordo ás directrices marcadas desde o Ministerio do Interior e o Ministerio de Defensa.
En concreto estarán situados na PO-405 ao seu paso polo municipio de Arbo e na PO-553 ao seu paso por Tomiño. Igualmente apostaranse na antiga aduana en Tui e en Salvaterra. Hai que lembrar que soamente se mantén aberto o punto fronteirizo da A55 entre Tui e Valença do Minho, mantendo os controis de seguridade que se están levando a cabo desde o pasado 17 de marzo tras o decreto do estado de alarma.
Este luns, ante a prolongación do estado de alarma, a subdelegada do Goberno, Maica Larriba, tramitou a instalación dunhas estruturas fixas máis dignas das que se atopaban no control da fronteira na A55 para que a Policía Nacional e a Garda Civil conten cunhas oficinas provisionais en condicións máis operativas.
