A Deputación de Pontevedra acaba de convocar as súas axudas para a promoción do deporte de alto nivel da provincia, dotadas este ano de preto dun 50% máis de recursos. Deste xeito, os deportistas que acaden as distincións de DEPO_DAN (alto nivel), DEPO_DAN+ (con discapacidade) e DEPO_TALENTO (alto nivel de base) recibirán en conxunto 405.000 euros fronte aos 275.000 euros da anualidade anterior. O incremento de recursos baséase na alta demanda destas axudas, para as que se recibiron en 2024 un 43% máis de solicitudes, e a Deputación avanza deste xeito na súa aposta polo deporte como área estratéxica de goberno.
As categorías DEPO_DAN e DEPO_DAN+ van dirixidas a deportistas, adestradores, xuíces e árbitros nados ou empadroados na provincia de Pontevedra co recoñecemento de alto nivel de Galicia ou de España, mentres que as DEPO_TALENTO beneficiarán a deportistas nados entre 2008 e 2013 que remataran nas tres primeiras posicións en campionatos de España ou que participasen en campionatos de Europa ou o mundo. O prazo de solicitude trala publicación das bases no BOPPO é de 20 días hábiles a partir deste venres 6 de xuño.
As axudas DEPO_DAN oscilarán entre os 500 e os 2.000 euros, segundo a súa clasificación en copas e campionatos do mundo, de Europa, de España ou de Galicia. Deste xeito, obterán 2.000 € os que acadaron algún dos 3 primeiros postos en copas do mundo, 1.250 € os que conseguiran o 4º posto en copas do mundo ou os 3 primeiros en campionatos de Europa, 900 € os que alcanzaron o 4º posto en copas de Europa ou os 3 primeiros en campionatos de España, e 500 € os que obtiveron o 4º posto na copa de España ou os 3 primeiros na de Galicia.
Na modalidade DEPO_DAN+ para deportistas con discapacidade física, intelectual ou visual, as axudas oscilarán entre os 1.000 e os 3.000 € tamén nos mesmos supostos que a categoría DEPO_DAN, pero aumentando as cantidades respectivamente aos 3.000, 2.000, 1.500 e 1.000 €. No caso de DEPO_TALENTO as axudas abranguen entre os 500 e os 1.200 euros en función dos seguintes resultados: 1.200 € para os que alcanzaron os 3 primeiros postos en copas do mundo, 800 € para os que obtiveran o 4º posto en copas do mundo ou os 3 primeiros en campionatos de Europa, e 500 € e para os que conseguiran o 4º posto en campionatos de Europa ou os 3 primeiros en probas de España.
A través destas axudas, a Deputación recoñece o talento de base e profesional das e dos deportistas con plena dedicación á actividade, coas esixencias e esforzos derivados dela (viaxes, adestramentos, concentracións e as propias competicións) que poden supoñer en ocasións un obstáculo para o desenvolvemento axeitado de carreiras profesionais complementarias á deportiva. A través desta convocatoria, a institución provincial reforza o seu compromiso cos deportistas da provincia co obxectivo de contribuír á súa actividade competitiva e á súa preparación técnica.
