A Universidade de Vigo é a única representante española na primeira Rede Iberoamericana de Blockchain e Ciberseguridade, unha iniciativa que botou a andar esta primavera e que está integrada por máis dunha ducia de grupos de investigación de oito países iberoamericanos.
A representación española na rede chega da man do equipo Sl1-GEAC, dirixido polo profesor de Linguaxes e Sistemas Informáticos Manuel Pérez Cota, para quen a posta en marcha desta rede supón “todo un reto de desenvolvemento de novas ferramentas xunto con colegas doutros países”.
A rede está coordinada desde a cidade arxentina de Córdoba polo doutor enxeñeiro Óscar Medina, da Universidade Tecnolóxica Nacional, e conta con membros, ademais da propia Arxentina, de Chile, Colombia, O Salvador, Panamá, Uruguai, Portugal e España.
O financiamento inicial é de 15.000 dólares provenientes do Programa Iberoamericano de Ciencia e Tecnoloxía para o Desenvolvemento, CYTED, dotación económica que se renovará de maneira automática durante os vindeiros catro anos.
Impulso das actividades formativas e máis relación coa industria
As actividades desta nova rede abarcan estudos comparativos e relevantes en Iberoamérica do marco técnico legal das tecnoloxías blockchain e de ciberseguridade, formación de novos talentos, incremento dos vínculos entres universidades, gobernos e empresas, modelado de contratos intelixentes, estudos de caso de uso de trazabilidade e de escenarios delitivos virtuais e “incluso de ferramentas e técnicas forenses aplicables á extracción e análise de evidencias baseadas neste tipo de tecnoloxías”, explica o docente vigués, quen conta con máis de 30 anos de experiencia na docencia teórica-práctica de diferentes materias relacionadas co desenvolvemento de software para o mundo da industria, xestión de empresas e colaboración con diferentes firmas do ámbito industrial e de desenvolvemento de software.
Estas actividades teñen como obxectivo contribuír á industrialización inclusiva e sustentable, fomentando a innovación mediante a aplicación do blockchain, incluíndo unha normativa “sólida e equitativa” para a formación de capital humano e a transferencia a sectores enerxéticos e de goberno.
A parte europea da rede coordinarase dende Vigo
A participación do grupo Sl1-GEAC da Universidade de Vigo neste proxecto xurde tras anos de colaboración coa Facultade Rexional de Córdoba, da Universidade Tecnolóxica Nacional, principal impulsora deste proxecto.
“De feito algún dos membros que participan son doutores egresados pola Universidade de Vigo”, explica Pérez Cota, ao tempo que subliña que ao longo destes anos puideron ver a necesidade de traballar de maneira conxunta nestes temas, sobre todo na parte de ciberseguridade, “pois é algo moi importante de cara ao futuro de calquera institución, por tanto fixemos varias reunións e arrancamos”.
Desde Vigo coordinarase a parte europea da rede e, a nivel investigador, os traballos centraranse, sobre todo, en temas de ciberseguridade. “O labor de unir a tantos grupos, tanto europeos como americanos, é algo que pode axudar a que a Universidade de Vigo siga medrando e mellorando a imaxe que proxecta cara ao exterior, algo moi importante tanto á hora de atraer novo alumnado como á de incrementar os intercambios do profesorado e do persoal en xeral”, apunta Pérez Cota.
Xunto a el participarán de maneira activa na xestión desta rede a investigadora Ana Isabel Díez Sánchez e o investigador Miguel Ramón González Castro, ambos do grupo de investigación Sl1-GEAC.
