Os sindicatos representados no Concello de Vigo criticaron á administración local por “prohibir” a celebración da asemblea prevista para este mércores na que o persoal municipal ía abordar xunto ao comité a “falta de diálogo” co Goberno local e o “proceso de privatización e precarización” dos servizos públicos como consecuencia da falta de traballadores.
“A Concellaría de Persoal remitiulles escritos aos xefes de área onte pola noite para que impedisen que os empregados públicos puidesen acudir á cita. A CIG xa anunciou que presentará unha denuncia nos xulgados contra esta “decisión antidemocrática”, informou a Central Intersindical Galega. “Os intentos do Goberno local vigués por boicotear a asemblea e impedir o dereito de reunión do persoal municipal provocaron a suspensión do encontro, que foi substituído por unha ruidosa protesta dos representantes sindicais, primeiro nos exteriores do consistorio e despois ás portas da Alcaldía e da Concellaría de Persoal”, explica este sindicato.
Desde a CIG entenden que se trata dunha “decisión antidemocrática” e critican tanto o fondo como as formas. “Foi comunicada mediante escritos aos xefes de servizo para que non deixasen saír os traballadores e fíxose con menos de 24 horas de antelación, un defecto de forma que incumpre os requisitos legais”. Por iso presentarán unha denuncia nos xulgados, de igual xeito que fixeron para garantir o dereito de folga dos bombeiros e contra os servizos mínimos abusivos.
“Se esta é a presentación da nova concelleira de Persoal, que saiba que nos vai ter enfronte dende o primeiro día”, sinalan dende a central sindical. “Semella que os servizos públicos e o emprego de calidade son o menos importante para este Goberno local”, lamentan. Finalmente, lembran que é a primeira ocasión que en democracia o Concello de Vigo impide a celebración dunha asemblea de traballadores.
