Os centros de saúde da área sanitaria de Vigo incorporaron este luns dez profesionais sanitarios -seis especialistas en medicina familiar e comunitaria e catro profesionais de enfermaría-. Trátase da metade das prazas de nova creación que o Sergas outorgou a Atención Primaria na cidade olívica e a súa comarca -un total de 20- e que supoñen un crecemento do seu cadro de persoal.
Desas 20 novas prazas, tres xa foron cubertas no pasado mes de febreiro – un médico e dúas enfermeiras no Punto de Atención Continuada de Cangas-Moaña -; e as sete restantes -dous fisioterapeutas, tres enfermeiras especializadas en obstetricia e dous pediatras-, incorporaranse nas próximas semanas.
Os seis facultativos que comezaron este luns fixérono nos centros de saúde de Val Miñor, Baiona e Matamá -os tres están acreditados como centros docentes na formación de médicos de familia- e nos centros de Teis, Pintor Colmeiro e Tomiño. En canto a enfermería, integraranse dúas enfermeiras xerais nos centros de saúde Teis e Pintor Colmeiro e dúas especializadas en Familiar e Comunitaria na Doblada e Coia.
