A través da Consellería de Economía, Emprego e Industria, a Administración autonómica activou este ano un programa que dá resposta aos cambios que a dixitalización e os novos hábitos de consumo están introducindo no sector e que se adapta e anticipa ás novas demandas e necesidades dos cidadáns.
Cun orzamento de 5,7 millons de euros, a medida vai dirixida a avanzar na dixitalización para mellorar a atención e experiencia do cliente, á vez que pon en valor a aposta polo produto local, a sustentabilidade e a economía circular, a responsabilidade social ou o deseño, facendo que estes sexan os seus elementos de diferenciación e especialización.
A iniciativa Comercio 360 ven substituír ao anterior concepto SmartCommerce creado no Plan de Impulso ao Comercio Interior de Galicia 2015-2020. Agora, cunha visión a tres anos (2019-2021), nesta primeira fase poñeranse en funcionamento medidas de sensibilización, axudas para a ecoinnovación e laboratorios comerciais.
Ademais da realización de xornadas e a análise de casos de éxito, a Consellería de Economía, Emprego e Industria traballará na labor de sensibilización e divulgación do Comercio 360. Tamén impulsa unha liña de axudas á ecoinnovación para impulsar a economía circular e a sustentabilidade no comercio a través da adhesión á plataforma de tícket dixital –que permite aos clientes e comercios coñecer o estado e garantía das súas compras ou vendas evitando a perda ou deterioro do tícket tradicional e minimizando o uso do papel–; da promoción dos ecoenvases realizados con materiais cen por cen biodegradables; ou implantando proxectos de economía circular que fomenten a reciclaxe e os produtos ecolóxicos.
Laboratorios comerciais en sete cidades
Servizos personalizados de mentoring, comunicación e publicidade, marketing intelligence ou mellora da xestión chegarán aos interesados a través da creación de sete laboratorios comerciais nas principais cidades galegas para asesorar e impulsar o Comercio 360.
Esta nova iniciativa, dirixida a pemes de menos de 10 traballadores, enmárcase na estratexia de impulso á competitividade do comercio de proximidade e ten como obxectivo ofrecer aos establecementos unha folla de ruta para conseguir un comercio diverso, moderno e adaptado ás novas realidades –reforzando tanto a súa imaxe física como dixital– e servizos, o que permitirá dinamizar tamén os centros urbanos das cidades e vilas galegas para facelos máis atractivos aos cidadáns, turistas e visitantes.
A Xunta márcase tres obxectivos prioritarios coa posta en marcha desta iniciativa: lograr que 10.000 comercios galegos se sumen a esta estratexia 360; que máis de 1.000 comercios se beneficien dos servizos de asesoramento; e que 5.000 comercios incorporen no seu modelo de xestión a aposta pola sustentabilidade e o tícket dixital.
Plan Extratéxico
O Plan Estratéxico de Impulso ao Comercio 2015-2020 facía referencia a aspectos máis dixitais, mentres que o Comercio 360 presenta unha estratexia máis global, que inclúe valores como a sustentabilidade, a aposta polo produto local, a creación de marca vencellada ao territorio e un novo concepto máis amplo de comerciante que inclúe tamén aspectos como o deseño ou a fabricación de produto propio.
O pasado ano xa se puxo en marcha unha liña específica dotada de 4,1M€ cos seguintes resultados: 487 axudas concedidas que suman preto de 2,37 millóns de euros, o que permite a mobilización final de investimentos que superan os 4,7 millóns.