O reitor Salustiano Mato foi o encargado de facer balance das accións programadas pola Universidade de Vigo durante os meses que o manuscrito permaneceu no Museo do Mar, como peza central da exposición Un tesouro en sete cantigas, desenvolvida en colaboración da Xunta de Galicia e que foi visitada por 50.000 persoas.
“Este foi un proxecto mobilizado pola Universidade, pero colectivo, no que participaron todo tipo de entidades para facelo posible, como a Asociación Pertenza, a Xunta, os concellos e o mundo da cultura”, explicou Mato na súa comparecencia, na que, xunto ao director da publicación, Alejandro Diéguez, presentou o caderno especial de 50 páxinas que o número 24 da revista Galegos dedica á obra de Martín Códax, a través de colaboracións de destacados referentes da vida cultural de Galicia, Portugal e da propia Morgan Library e que inclúe un CD coa interpretación das cantigas a cargo de músicos como Roi Casal, Uxia, Abe Rábade ou a poetisa Yolanda Castaño.
Mato aproveitou a súa comparecencia para agradecer a implicación na iniciativa da Universidade, que logrou por primeira vez que o Pergamiño Vindel abandonase a Morgan Library de Nova York, de todas as persoas e colectivos que ao longo de dous anos fixeron posible que a obra de Codax regresase á beira do mar que o viu nacer hai oito séculos.
Mención especial fixo o reitor da Universidade de Vigo á Morgan Library, asegurando que “pasamos con nota o traballo e seguimos a contar coa súa confianza”. Mato manifestou o interese da institución académica de abrir unha porta á colaboración cara o futuro nos ámbitos da investigación, a cultura e a divulgación. “Este foi un evento moi importante para Galicia e para a Universidade supuxo unha relación moi positiva coa Morgan que espero que se manteña con esta entidade de elite”, dixo Mato.
62 actividades para difundir e formar sobre o Vindel
En canto ás actividades que a Universidade de Vigo programou e realizou durante os meses da estadía do Pergamiño Vindel na cidade, 30 foron de difusión, 24 de formación e oito institucionais.
As máis salientables na difusión da peza de Martín Códax foron: a exposición Un tesouro en sete cantigas celebrada no Museo do Mar e que, ademais de polo público xeral, tamén foi visitada por representantes institucionais e da vida social e cultural de Galicia, como a Mesa do Parlamento ou o Consello da Cultura Galega; o ciclo de cantares de cego interpretados por Luis Correa “O Caruncho” e Chus Iglesias en máis de vinte cidades e vilas de Galicia, interpretando as sete composición de Martín Códax ou o concerto de Nadal da Universidade con Cristina Pato, acompañada por outros artistas.
Neste apartado tamén se inclúen as publicacións realizadas co gallo da presenza do Vindel en Vigo, entre as que destacan: o catálogo da exposición Un tesouro en sete cantigas; a obra As cantigas de Martín Códax en 55 idiomas, coordinada polo docente e investigador do Departamento de Filoloxía Galega e Latina da Universidade de Vigo Xosé- Henrique Costas e o caderno especial da revista Galegos, presentado este martes.
En canto ás actividades de formación destacan: o Simposio Científico Internacional E irei, madr’, a Vigo; o ciclo de conferencias Os Xoves do Vindel e proxeccións e relatorios desenvolvidos, tanto na Universidade como fóra dela. Polo que se refire ás accións institucionais, entre elas están a sinatura do acordo entre a Xunta e Galicia e a Universidade de Vigo para a organización dun programa de actividades conxuntas; o acto de entrega do Pergamiño Vindel á Universidade de Vigo na Morgan Library de Nova York; a homenaxe da Real Academia Galega ao Pergamiño no Paraninfo da Universidade e a gala de despedida ao Pergamiño no Museo do Mar.
Un perfecto remate a unha gran idea
Na presentación do caderno especial que sobre o Pergamiño Vindel inclúe o número 24 da revista Galegos, o seu director Alejandro Diéguez, cualificou a publicación e o CD que a completa como “un perfecto remate a unha gran idea”.
Mentres Mato incidiu na importancia que a difusión da revista terá para a colectividade galega no exterior poida afondar no coñecemento do trobador vigués, Diéguez gabou o papel de dinamizador cultural desenvolvido pola Universidade como promotor do regreso do Pergamiño Vindel a Galicia, ao tempo que agradeceu que se lle propuxese á revista que dirixe a publicación deste caderno especial de 50 páxinas que recolle, entre outros, traballos de Antón Lamazares, César Portela, Xosé Luis Méndez Ferrín, Víctor Fernández Freixanes, Camiño Noia e unha entrevista con Roger S. Wieck, conservador e xefe do servizo de manuscritos medievais e renacentistas da Morgan Library & Museum de Nova York.
En canto ao CD, Roi Casal é o encargado interpretar a primeira cantiga de Códax, Ondas do mar de Vigo; mentres que Uxía pon voz a Mandad´hei comigo e Eladio Santos encárgase da interpretación de Mia irmana fremosa, treides comigo. Pola súa banda, o ensemble Martín Códax interpreta Ai Deus! Se sabóra meu amigo; Alejo Amoedo e Susana de Lorenzo Quantas sabedes amar amigo; a poetisa Yolanda Castaño recita Eno sagrado, en Vigo e Abe Rábade pecha o CD coa interpretación de Ai ondas que eu vin veer.