O obxectivo do Concello é «retomar aquela tan mal feita humanización do goberno anterior» e substituír o pavimento por outro firme «flexible» para «acabar co ruído» actual do tránsito de vehículos, ademais de contemplar un deseño «acorde» á preferencia peonil sobre o tráfico rodado.
O Goberno de Vigo reserva 1,2 millóns de euros para esta mellora da Alameda, cunha previsión de seis meses de execución das obras.
Caballero deu conta tamén doutras dúas humanizacións que pasaron pola última Xunta de Goberno Local, en Purificación Saavedra e na Avenida Atlántida. O goberno vigués deu luz verde á contratación das obras do proxecto de humanización da primeira fase de Purificación Saavedra, por importe lixeiramente superior aos 300.000 euros e un prazo de execución de cinco meses. O Concello aprobou os pregos de cláusulas e abre o proceso de licitación.
En segundo lugar, tamén validou o proxecto de humanización da Avenida Atlántida por importe de case medio millón de euros e un prazo de execución estimado en tres meses. Estas tres humanizacións totalizan dous millóns de euros de investimento municipal.
