As instalacións, que contan cunha superficie de 101 metros cadrados e ven a substituír a anterior oficina de apenas 25 metros na entrada do Parador Conde de Gondomar, construíse cun investimento de 136.00 euros, aportados na súa maior parte pola Axencia de Turismo de Galicia e ao que tamén achegaron fondos a Deputación de Pontevedra e o Concello de Baiona.
A Oficina de Turismo de Baiona, unha das poucas de Galicia que permanece aberta durante todo o ano foi deseñada pola arquitecta Verónica Zúñiga cunha cuberta axardinada.
Durante o acto, Nava Castro explicou que este novo centro de información turístico dá resposta á intensa demanda turística rexistrada nos últimos anos no concello de Baiona.
Neste senso, a responsable de Turismo da Xunta fixo referencia ás últimas cifras publicadas polo Instituto Nacional de Estatística correspondentes ao pasado ano 2016. Segundo estas, o destino Rías Baixas superou a súa cifra de viaxeiros aloxados nun 11,4%, rexistrando 1,28 millóns de viaxeiros, e nun 11,8% o nivel de pernoitas, con máis de 3 millóns neste caso. “Este comportamento positivo da demanda permitiu que os establecementos hostaleiros das Rías Baixas mellorasen o pasado ano as cifras de ocupación do 2015, en 3,7 puntos porcentuais”, sinalou.
A directora de Turismo de Galicia manifestou que grazas a esta nova oficina os turistas que se acheguen a Baiona dispoñerán dun centro de referencia con atención de calidade onde atopar toda a información turística que necesiten.
“Esta mellora na atención ao turista contribuirá a continuar nesta senda de crecemento que vén experimentando Baiona nos últimos tempos”, concluíu Nava Castro.
O recoñecemento oficial como ruta xacobea do Camiño Portugués pola Costa, no que Baiona é epicentro, incrementou considerablemente nos últimos meses a afluencia de peregrinos á oficina turística, que tamén constata un aumento dos visitantes de nacionalidade estranxeira.
“A nova oficina era unha necesidade para un concello como o noso que é referencia turística en toda España e as instalacións reforzan a a oferta informativa para todos os visitantes”, explicou Ángel Rodal antes de explicar que a oficina estará a pleno rendemento durante a Festa da Arribada que vaise celebrar os próximos 3, 4 e 5 de marzo.
Ao acto tamén asistiron o conselleiro de Sanidade e exalcalde de Baiona, Jesús Vázquez Almuiña; o delegado da Xunta en Vigo, Ignacio López-Chaves; a concelleira de Turismo, Beatriz González, así como unha ampla representación da Corporación Municipal de Baiona e do sectores económicos, deportivos, turísticos e sociais da vila.
