Rubén Pérez, voceiro da Marea de Vigo, referiuse este venres á posible venda do Celta a un grupo inversor estranxeiro, tal e como saíu á luz pública nos últimos días. En opinión do concelleiro vigués hai que modificar o convenio entre o Concello e o Celta para o uso do estadio municipal de Balaídos.
“O primeiro inversor que ten que poñer diñeiro para axudar a cidade de Vigo é o que o está desgastando, o Celta. É a primeira entidade que ten que invertir para que o equipo xogue en Europa e a cidadanía disfrute do fútbol. A entidade privada vai a facer negocio, polo tanto hai que cambiar o convenio”, indicou.
O acordo entre o Celta e o Concello pola utilización de Balaídos renovouse no ano 2009 e non remata ata o 2034. Aquel documento prorrogou as condicións suscritas no anterior convenio, do ano 1992, mediante o cal cedíase ao clube o uso das instalacións de Balaídos, Barreiro e A Madroa a cambio do pago dos gastos de luz e auga. O Concello corre cos gastos estructurais (obras maiores), así como mantemento dos terreos de xogo.
“Se nós temos que pagalo, porque é un edificio municipal, non hai ningún problema, pero como se fixo no Real Mallorca, se cambia o convenio despois da modificación do estadio e o Celta colabora coa cidade que está a facer un esforzo económico brutal, 30 millóns de euros, que son 15 anos de cheque social, a 1,6 millóns de euros ao ano”, apuntan dende A Marea.
“O Celta que colabore, e a mellor maneira de colaborar é que cambie o convenio, que pague un aluguer mensual dentro das condicións que sexan ceder parte dos ingresos económicos brutais que vai a ter por participar na Uefa”, engadíu Rubén Pérez.
O voceiro da Marea tambén falou de “rumores que nos chegan” sobre a modificación da luz porque coa nova grada cambia a iluminación do estadio. “Que colabore cedendo parte dos ingresos das entradas como fan algúns clubes do resto do Estado ou que cambie ese convenio para que sexa ventaxoso para as dúas partes”, apuntou.
“Non é ilegal, é unha operación especulativa, vai facer un negocio importante, un clube de fútbol non é un activo público, que estea en mans dun señor de Mexico o China dame igual, interésame que ese espacio é público”, sinalou antes de posicionarse en contra da aportación do Consorcio da Zona Franca á ampliación de Balaídos. “Trinta millóns é unha animalada, non estamos dacordo con que pague a Zona Franca, está para outra cousa, para que dinamice a economía das empresas, que invirta no edificio do Celta publicitariamente soa moi ben pero non é a súa labor”, asegurou.
“E se vendemos un Celta a un grupo chino na Uefa e o equipo acaba en Segunda. Seguimos nós pagando a obra? Non habería retorno para a cidade”, advertíu Rubén Pérez.
Deportivo, Racing e Compostela
Na réplica, o alcalde, Abel Caballero, sinalou que “habería que preguntar ao señores da Marea se o Concello da Coruña, Ferrol o Santiago, onde gobernan, cóbranlle aos seus equipos de fútbol por utilizar os estadios. O alcalde da Coruña quere cobrarlle ao Deportivo polo uso do estadio?”.
“Parece unha broma, os equipos de fútbol danlle un retorno do cento por dez ás cidades”, explicou Caballero antes de non querer entrar a valorar a posible venda do Celta a un grupo inversor estranxeiro. “Solo opero sobre certezas, non falo de hipóteses”, sinalou.