O nivel dos competidores que estaban en Pontevedra amosábase sobre o tapiz. Combates de gran beleza e algunhas palizas se tiñas a mala sorte de cruzar con algúns dos olímpicos aquí inscritos. E a calidade deportiva tamén tiña o seu reflexo na grada, que estivo case chea ao longo de todo o día, e gozando co espectáculo existentes. En total 400 deportistas que loitaban por subirse ao podio nos 16 pesos (oito por categoría) e sumar puntos para o ránking mundial.
Na categoría de -49 quilogramos logrou o triunfo a gran favorita, a campioa olímpica Brigitte Yague. En -67 quilogramos, dúas galegas entre as competidoras e ambas con gañas de acadar bos resultados. Lúa Piñeiro superou con facilidade á primeira primeira rival, a deportista da Federación de Baleares, Leonor García (23- 4). En cuartos tiña un complicado combate fronte a británica Lauren Williams e cumpriuse o guión esperado. Durísimo enfrontamento que se decidiu no último segundo do punto de ouro, nunha acción con suspense que parecía non querer subir ao marcador. Ao final, 1-0 e xa nas semifinais, onde tiña á eslovena Franca Anic (levou o ouro) e coa que perdeu (4-0) e non puido plantarse na final.
E Katia tamén nos traía alegrías en Pontevedra. Gaña o primeiro combate de forma xusta (01-0) contra a deportista de Costa Rica, para nos cuartos arrollar a Laura Saez (10-0). Na semifinal, derrota contra á representante de Exipto (9-6) nun interesante combate. Así, dous bronces para as galegas Katia Calvar e Lúa Piñeiro.
En +73, Sabela López logrou a medalla ao superar nos cuartos de final a Nacha Peñalver por 0-3. Nas semifinais, tivo a mala sorte de cruzarse coa campioa do mundo Rosanna Simón, que foi superior (9-0). Bronce para a galega e ouro para Rosanna, que gañou a final a alemana Lorena Brandl (7-3).
En categoría masculina, espectacular actuación a do deportista do Natural Sport Adrián Jiménez en -54 quilogramos. Eliminou no primeiro combate ao alemán Alexander Mueller (8-15), na segunda rolda gañou a Mourad Laacharaoui (10-8) e nos cuartos superou ao cabeza de serie número 5, Carlos González Correa por un rotundo (0-9). Na semifinal, derrota contra o irlandés Jack Woolley (16-8), que precisamente eliminara na primeira rolda a Miguel Cobas. Ouro para Jesús Tortosa.
Por último, -63 quilogramos foi un dos pesos con máis competidores (37) e dun altísimo nivel, coma o exipcio número 1 do ranking Mohamed Asal ou o campión olímpico Joel González. E entre eles dous galegos que cumpriron cunha boa actuación. Borja Ríos gañou no primeiro combate ao británico Chirtopher Cocker por 6-4 (todo se decidiu nun precioso último asalto) e tivo a mala fortuna de cruzarse con Joel na seguinte rolda. Caeu por 0-4. Pola súa banda, Luis Reiriz gañou ao representante de Porto Rico (10-14) e caeu fronte ao portugués Nuno Costa (número 6 do ránking) por 3-8. Coma era de esperar, ouro para Joel González.